Шайыл Пӧртныр сола

Ирӹкӓн энциклопеди Википеди гӹц материал
Перейти к навигации Перейти к поиску

Цилӓжӹ кым Пӧртныр улы: Церкӹсир Пӧртныр, Вессир Пӧртныр да Шайыл Пӧртныр. Пӧртныр сола лӹм "Пӧрт" дон "ныр" шамаквлӓ гӹц ушналтын. Шайыл Пӧртныр сола Церкӹсир Пӧртныр гӹц йыдвелыш ик уштыш шайылны шӹнза. Седӹндон тӹдӹм Шайыл Пӧртныр манын лӹмденӹт. XVI - XVIII курымвлӓн Акпарсын сотньышкыжы пырен.

1859 ивлӓн солашты 64 тома ылын, нӹллӹ и лошты 72 пӧрт якте кушкын. Тӹштӹ нӹлшуды нӓрӹ эдем ӹлен. 2001 иэш цилӓжӓт 51 томашты 74 пуэргӹ дон 87 ӹдӹрӓмӓш шотлалтыныт.

1929 ин солашты "Трактор" колхозым цымыренӹт, тӹшкӹ пӹтӓри цилӓжӓт шӹм семня пырен. Лу ишты кым сола гӹц Горький лӹмеш колхозым ӹштенӹт. 1980 и гӹц сола "МАССР-лан 60 и" лӹман совхозыш ушналтын, 1996 и гӹц "Эмӓнсола" КДП-ышты шотлалтеш.

Кого вырсын тылыштыжы Шайыл Пӧртныр гӹц 60 эдем кредӓлын, нӹнӹ логӹц 28 веле мӹнгеш сӓрнен толыныт. Сола халык Шайыл Пӧртныреш шачын-кушшы капитан Архип Иванович Лужайкин, художник Николай Петрович Алманов, Мары Элын Верховный судын председательжӹ Александр Сергеевич Давыдов, хирург Владимир Иванович Гордеев доно когоэшнӓ.