Тышнал
«Кырык марӹ-немӹцлӓ лӹмдерӹм» погышы финн шӹмлӹзӹ дӓ дипломат Рамстедт Густав Йон (1873—1950) 1898-шӹ ин кырык марынвлӓ докы каштмы экспедициштӹш рапортыштыжы Тышнал гишӓн тенге сирӓ: «Сола изи, иктӓ 30 пӧртӓн ылын. Терентин пӧртшӹ, кышкы мӓ толмы семӹньннӓ пырышна, изи дӓ незер. Сола покшалны Кузьминвлӓн пӧрт шӹнзен. Кузьминвлӓн пӧртӹм ӹлӓшнӓ арендуйышна дӓ нӹнӹн школым тымень пӹтӓрӹшӹ Тимофей лӹмӓн когорак эргӹштӹ, кыды 17 иӓш ылын, мӓмнӓн палшышына ли. ӹлӹмӓшнӓ вӓрӹн-вӓрӹш шӹнзӓш тӹнгӓльӹ. Ни вӓтем, ни мӹнь ӹшкежӓт Тышналыш вӓрештмӹнӓм ойхырыделна.» («Цикмӓ» Н 1/95, 25 ӹл.) Мажы характерно, Рамстедт Терентин имнижӹ улы гӹнят (нӹнӹ Терентин араваэш Тышналыш Цикмӓ пазар гӹц толыныт), тӹдӹм незереш шотла. А махань классыш тӹдӹм Н. Игнатьев шагалта ылын? Седӹ, цилӓ относительно. Улан семняштӹ шачшы дӓ университетӹштӹ тыменьшӹ Густав Рамстедтӹн сӹнзӓштӹжӹ, Теренти незер ылеш, а Н. Игнатьев тӹдӹм уланеш шотлен кердӹн.