Тегӓй
Тегӓй сола Кого Йынгын шалахай покаштыжы, Сидункырык сола гӹц ӱлнӹрак, шӹргӹ лошты шӹнзӓ. Тӹдӹ Пайскырык сола поселениш пыра. Солам вес йишлӓжӹ эче Копонлык маныт. Когораквлӓн попымы семӹнь: "Пӹтариок сола халык Копон солашты ӹлен, вара тӹшец рушынвлӓ поктен колтенӹт. Тегӓй лӹмӓн пӱэргӹ шӹргӹ лошты яжо вӓрӹм мон, кодшывлӓжӓт тишкӹ толыныт да изи солам ӹштеныт. Тенге Тегӓй сола шачын, тоштым ӓшӹндарен солам эче Копонлык манын лӹмденӹт."
1795 ивлӓн сола Акпарсын сотньышкыжы пырен.Тӹштӹ цилӓжӓт лу тома веле ылын, тӹштӹ вӹцлӹ эдем нӓрӹ ӹлен. 1915 ивлӓн сола 16 томаан якте кушкын, эдем шотшат 64 лин. 2012 ивлан кӓндӓкш тома кодын, кышты 7 ӹдӹрӓмӓш да 5 пӱэргӹ ылӓт.
1935 ивлӓн солашты "Валгынзыш" колхозым ӹштеныт. Вуйлатышыжы Сергей Сергеевич Марков лин. Кого вырсы паштек сола халык Большевик" колхозыш ушнен.