Панькансола
Панькан сола (рушла Панькино) — Цикмӓ-Микрӓк когогорнышты вӓрлӓнӓ. Эмӓн якте 2 уштыш. Сола гӹц мӹндӹрнӹ агыл Кого Йынгышкы шалахай монгыр гӹц йоген пырышы Ымбал ӓнгӹр йоген эртӓ. Панькан сола лишнӹ техень каремвлӓ улы: Батька карем, Шарды карем, Листер вуй. Сола лӹм ти вӓрӹш пӹтӓришӹ ӹлӓш толшы марын лӹм доно кӹлдӓлтӹн. Перви ти солам «Алмандаево» маныныт.
Истори
[тӧрлӓтӓш | кодым тӧрлӓш]Пӹтӓришӹ гӓнӓ документвлӓштӹ Панькан сола гишӓн 1717-шӹ ин срен кодымы ылын. Сола халык первишен мӱлӓндӹ пӓшӓм ӹштен, вольыкым урден. 1930-шы ин 19-шӹ августын солашты «Кыралшы» колхозым ӹштӹмӹ. Тӹдӹн пӹтӓришӹ вуйлатышы Роман Николаевич Смиренский ылын. 1930-шы ивлӓн Актусола марывлӓ Панькан лишнӹш каремӹштӹ кӹрпӹц сарайым чангенӹт, тӹштӹ кӹрпӹцӹм ӹштенӹт дӓ тӹдӹн доно Йоласал райисполкомым чангенӹт. Кого Вырсышты Панькан гӹц 62 эдем кредӓлӹн, нӹнӹ логӹц коклы вӹзӹтӹнжӹ коленӹт, а кымлы шӹмӹтӹн токышты пӧртӹлӹнӹт. Тидӹ: мл. лейтенант Николай Андреевич Евсеев, сержант Михаил Иванович Лобанов, рядовой Валериан Семёнович Седов дӓ молат.
Ӹлӹзӹ шот
[тӧрлӓтӓш | кодым тӧрлӓш]1717-шӹ и — 15 кудывичӹ (41 пӱэргӹ, 37 ӹдӹрӓмӓш);
1795-шӹ и — 47 кудывичӹ;
1859-шӹ и — 42 кудывичӹ (99 пӱэргӹ, 120 ӹдӹрӓмӓш);
1897-шӹ и — 59 кудывичӹ (131 пӱэргӹ, 130 ӹдӹрӓмӓш);
1915-шӹ и — 52 кудывичӹ;
1922-шы и — 59 кудывичӹ, 249 эдем (119 пӱэргӹ, 130 ӹдӹрӓмӓш);
1925-шӹ и — 300 эдем;
1929-шӹ и — 63 кудывичӹ, 328 эдем (153 пӱэргӹ, 175 ӹдӹрӓмӓш);
2001-шӹ и — 66 кудывичӹ, 177 эдем (80 пӱэргӹ, 97 ӹдӹрӓмӓш).