Кӓтӓ Шошмар
Кӓтӓ Шошмар — сола Кырык сирӹштӹ. Цикмӓ якте 67 уштыш. Ти соламок эче Кого Шошмар маныт. Сола лишнӹ Ловичӹ карем, Изисола карем, Кок ӓнгӹр ло карем лӹмӓн вӓрвлӓ ылыт. Первижок шошмарвлӓ Лысково лишнӹш Шоша ӓнгӹр дорцынла кӹзӹтшӹ вӓрӹш ӹлӓш ванженӹт. Седӹндоно солан лӹмжӓт Шоша лӹм доно кӹлдӓлтӹн. Шошмар XVI-XVIII-шы курымвлӓн Акпарс лужавуйын мӱлӓндӹшкӹжӹ пырен. 2001-шӹ ин Шошмарышты 187 эдем ӹлен.