Кого тум
Шайыл Пӧртныр сола доны, йыдвелӹшкӹлӓ, 150 ашкыл ӧрдӹжӹштӹ, кого тум шалга. Тӹдӹ цилӓм кого ылмыжы доно дӓ кӹжгӹцшӹ доно цӱдейӹктӓ. Тумын торешӹжӹ кок метр нӓрӹ лиэш,йӹржӹ вӹц кого пӱэргӹ веле элтӓлен нӓлӹн кердӹт. Пушӓнгӹн кӱшӹл мычашыжы кошкен, но покаш шӓрлӹшӹ укшвлӓжы яргата ыжар ӹлӹштӓшвлӓ доно мадыт. Тумым пӧрттӱн цӱдӓжӹ маныт, памятникеш шотлат. Вет тӹдӹ Акпарс ӹлӹмӹ годшен, Иван Грозныйын кугижа ылмы годшен, кушкеш да пакылажат маняр курымым эче ужеш, иктӓт ана пӓлӹ. Перви ти тум доны салтакым ыжатенӹт, мӹнгеш шуок сӓрнен толаш согоньленӹт. Кӹзӹт кого тум докы хынавлӓ, туриствлӓ толаш яратат. Тум йӹр яжо вӓрӹм ӹштен шӹндӹмӹ, ашкед кеӓш итӹрӓ тум ташкалтышым шӓрӹмӹ, кок тӧнгӹлӹм шӹндӹмӹ да аншлагым шагалтымы.