Альбинский, Андрей Данилович

Альбинский, Андрей Данилович
Шочын	1790 и
Тыршымаш алан	Иерей, переводчик Библии, туныктышо

Андрей Данилович Альбинский (1790 – кышты дӓ кыце колен, пӓлӹ агыл) ― халыкланна сотым кандышы, Черемисская грамматикын авторжы.

Биографижӹ

Кырык марий свӓщенникӹн йыхышты шачын. 1805-1811 ивлӓн Азанышты Духовный академиштӹ тыменьӹн. Тӹдӹм отличи доно тымень пӹтӓрӹмӹкӹжӹ, Пӧртныр солаш толын дӓ церкӹ свӓщенник лин. Тиштӹ тӹдӹн ӓвӓжӹ дон ӹзӓжӹ семняжӹ доно ӹленӹт. 22 иӓш ӹрвезӓш Василий Иванович дьӓкӹнӹн 14 иӓш Мария ӹдӹржӹм нӓлӹн. Семня ӹлӹмӓш гӹц пасна А.Д. Альбинский сӓрӹмӓш пӓшӓм ӹштен шалген. 1821-шӹ ин Санкт-Петербургышты Лукан Евангелим пасна книгӓ доно ецӓтлен лыктеш. 1824 ин Альбинский Цикмӓ халаштыш Валгыды Тройцы соборышты протери лин. 1825 ин тӹдӹм Азанышкы кафедрӓн Благовещени соборышкы свӓщеннниклӓн ваштенӹт. 1826-шы ин духовный семинаришкӹ ванжен. 1828-1830 ивлӓн Азаныштышы уезд училищештӹ, вара духовный училищештӹ мары йӹлмӹм тымден. тӹнӓмок сирӹмӹ пӓшӓш пижӹн. 1830-шӹ ин Синод шӱдӹмӹ доно «Черемисская грамматика» лӹмӓн книгӓм сирӓ. Ти кидпӓшӓ 7 и училищӹн канцеляриштӹжӹ киэн, вара 1837 ин Азан университет типографиштӹ пасна книгӓ доно пецӓтлӓлт лӓктӹн. 1200 экземпляран ылын. 1825 ин А. Д. Альбинскин 29 иӓшӹнок сӓмӹрӹк вӓтӹжӹ кола. Тӹдӹн вӹлӓн вӹц тетяжӹ кодын (сек коголанжы 12 и ылын, изилӓнжӹ 1 и). Церкӹ правилӹ доно тӹды –кокшӹ гӓнӓ ӹдӹрӹм нӓлӹм кердде. Шукы и тӹдӹ нелӹвлӓм сӹнгӓш цацен ӹлен. 1830 ин прошеним сирен мӹнгеш Пӧртныр солашкы сӓщенникеш кеӓш ядеш. Тӹдӹн ядмыжым шоктымы ылын. 1830 ин ӹшке шачмы вӓрӹшкӹжӹ портӹлӹн. Но тӹдӹ тиштӓт ладна ӹлӹмӓшӹм моде. 1832 ин Цикмӓштӹш церкӹ правлениш ядмашым сирӓ дӓ Азаныштыш Зилант монастирӹн шӱмбел кӹмдемӹш колташ ядеш. Пӓлӹ: архиепископ Филарет ти ядмашым тореш лыктын, тӹдӹ А.Д. Альбинскилӓн мары йӹлмӹ доно лӹмдерӹм сирӹктӹнежӹ ылын. Тидӹ пӓштек махань пуйырымаш Альбинским вычен, пӓлӹ агыл.