Акпарсын кӱжӹ

Шӧртньӹ Орда веремӓн кырык сирӹштӹ Акпарсын, Аказинын, Кобашын,Токсубайын сотньывлӓштӹ, Тохпайын, Яныгитын вӹцлӹ эдем рӓдӹ ылыныт. Техень пайылымашыжы кырык сирӹштӹнӓ веле агыл, а руш кымдем хӓлӓ ылын. Сухин солаэш шачын кушшы дӓ варажы Пӹзӹкныр школышты истори предметӹм тымдышы И.Я.Моляров тенге сирен: "Акпарс Кого Йынгы рекӓ доны Цермышал да Йоласал солавлӓ гӹц нӹл уштыш ӧрдӹжӹштӹ Нужанал околодокеш шачын. Кырык мары халык лошты патыр эргӹ со анзылнырак ылын, ӹшкӹмжӹм лӱддеок кычен. Шур да Вӹтла рекавлӓ дорц Кого Йынгын сирвлӓ яктежы земля доно хозаланен. Межам ӹнжы вашталтеп манын, Йынгы тӹреш кого кӱм шуэн дӓ: "Тиды мӹньӹн земляэм!" - манын келесен. Кӹзӹтӓт ти кого кӱм ужаш лиэш.