Лагы

Ирӹкӓн энциклопеди Википеди гӹц материал
Январланышы (вӓр гӹц вӓрӹш сӓрнӹшӹ) лагы. Turdus-migratorius

Лагы (латинлӓ Turdus) — лагывлӓн группыш оравивлӓн йыхыш пырышы кек. Кӹзӹт цилӓжӹ 62 тӹрлӹ лагы йиш пӓлӹ. Рок мыч шӹнзӹлдӓл тӹргештӹл кеӓт. Европышты, Азиштӹ дӓ Америкышты вӓшлиӓлтӹт. У Зеландиштӹ кандымы кеквлӓэш шотлалтыт. Тел гачеш, кого араш погынен, шокшы вӓрӹш чонгештӓт. Пӹжӓшвлӓштӹм пушӓнгӹвлӓ, тӹшкӓвлӓ дӓ рок вӹлнӓт вӓк, лач мыжырынат дӓ кого партьыштат оптат. Пӹжӓшвлӓштӹ кукшы шуды гӹц якшар рок яре оптымы ылыт. Кӓнгӹж гач 1-2 гӓнӓ игӹвлӓштӹм лыктыт. Пӹжӓшӹштӹ 3-7 мыны якте лин кердеш. Шукшвлӓм, капшангывлӓм, ӓнгӹремшӹвлӓм, йӹлвлӓм качкын ӹлӓт.