Келегарем

Ирӹкӓн энциклопеди Википеди гӹц материал

Келегарем (рушла деревня Сидуково) — Изи Йынгы (ӓнгӹр) вургымла велнӹ вӓрлӓнӓ. Картук якте пел уштыш. Сола лишнӹ техень карем дон лидӹвлӓ улы: Петрам карем, Олмаву сир, Окша карем, Тютю лидӹ, Опан карем, Мыртекнер. Сола лӹм тӹдӹлӓн тӹнгӓлтӹшӹм пиштӹшӹ мары лӹм (Келе)дӓ «карем» (овраг) шамаквлӓ гӹц лин.

Истори[тӧрлӓш | кодым тӧрлӓш]

Пӹтӓришӹ гӓнӓ сола гишӓн 1795-шӹ ин сирен кодымы ылын. Сола халык первишен мӱлӓндӹ пӓшӓм ӹштен, вольыкым урден. Ӹдӹрӓмӓшвлӓ ӹштӹ дон вочыгачым ӹштенӹт. 1913-шы ин солашты кок мардеш вӓкш ылын. 1921-шӹ ин лыдмы пӧрт пӓшӓм ӹштен. 1930-шы ин сола халык «Агроном» лӹмӓн колхозым ӹштен. Тӹдӹн пӹтӓришӹ вуйлатышыжы Ефим Семёнович Белопасов ылын. Кого Вырсышты ти сола гӹц 27 эдем кредӓлӹн, нӹнӹ логӹц луаткуд эдем колен, а луатиктӹнжӹ токышты пӧртӹлӹнӹт. Тидӹ: рядовойвлӓ Федот Яковлевич Белопасов, Иван Николаевич Серебряков, Павел Герасимович Сиваев дӓ молат.

Ӹлӹзӹ шот[тӧрлӓш | кодым тӧрлӓш]

1795-шӹ и — 5 кудывичӹ;
1859-шӹ и — 10 кудывичӹ, 50 эдем (22 пӱэргӹ, 28 ӹдӹрӓмӓш);
1897-шӹ и — 12 кудывичӹ (36 пӱэргӹ, 40 ӹдӹрӓмӓш);
1915-шӹ и — 13 кудывичӹ, 82 эдем;
1919-шӹ и — 12 кудывичӹ, 94 эдем (53 пӱэргӹ, 41 ӹдӹрӓмӓш);
1925-шӹ и — 95 эдем;
1929-шӹ и — 20 кудывичӹ, 111 эдем (55 пӱэргӹ, 56 ӹдӹрӓмӓш);
2001-шӹ и — 21 кудывичӹ, 65 эдем (31 пӱэргӹ, 34 ӹдӹрӓмӓш).